العسيى تكتب.. وطني يستحق الأفضل

عكاظ الأخباريه
فيروز العيسى.
الوطن هو المكان اللي بنكبر فيه وبنحمل اسمه بكل فخر، والانتماء إله مو بس حكي الانتماء الحقيقي يبين بأفعالنا وتصرفاتنا اليومية لما نحافظ على شوارع بلدنا ونخليها نظيفة هيك بنكون نعبر عن حبنا واحترامنا للوطن.

للأسف في ناس لسه بتكب النفايات بالشارع العام ومن حق عمال الوطن يحتلفوا بوطنهم كمان مش يضل ينظف وراكم وثم انه هاي العادة بتشوه منظر البلد وبتضر البيئة وصحة الناس النظافة مسؤولية الجميع وكل واحد فينا لازم يبدأ من نفسه يرمي النفايات بمكانها ويشجع غيره يعمل نفس الشي

الكل بطلع يعبر عن حبه لبلده ويرفع العلم ويفرح بالمناسبات الوطنية. هاي الأوقات بتخلينا نحس بالفخر والانتماء وبتقرب الناس من بعض أكثر.

بس للأسف مرات بتصير بعض التصرفات الغلط اللي بتخرب فرحة الاحتفال، مثل التفحيط بالسيارات، أو إغلاق الشوارع، أو رمي النفايات وأحيانًا الإزعاج والتصرفات المتهورة والمشاكل اللي ممكن تسبب حوادث ومشاكل بين الناس.

الاحتفال الحقيقي لازم يكون بوعي واحترام حتى تضل الفرحة حلوة وما نأذي غيرنا.

حب الوطن مو بس بالأغاني والاحتفالات، حب الوطن كمان بالأخلاق والمحافظة على الأمن والنظام والنظافة ونحافظ على بعض ونحب بعض ونكون قلب على قلب ولما نحتفل بطريقة مرتبة ومحترمة بنعطي صورة حلوة عن شعبنا وكمان لفت نظري يافطات من اشخاص كتابيه تعبر عن عشق وغرام ياخوان الوطن ما بتشبه ب اشخاص ولا بقلوب عشقانه من متى كنا نعمل هيك للاسف وكمان سياره ميرميه للممغوصين هاي لحالها مغصتني لانه إثارة الفتنة من أكثر الأشياء اللي بتفرق الناس وتزرع المشاكل بينهم سواء كانت بالكلام أو نقل الحكي والإشاعات مرات كلمة صغيرة ممكن تعمل خلاف كبير وتخلي الناس تزعل من بعض بدون سبب حقيقي.

الشخص الواعي ما بفرق بين مسلم ولا بنقل أي كلام يسمعه ولا يعبر بصور ودايمًا يحاول يصلّح بين الناس بدل ما يزيد المشاكل. ديننا وأخلاقنا علمتنا إن المحبة والاحترام أهم من الفتن والخلافات، لأن المجتمع القوي يكون متماسك ومتعاون.

بالنهايه اسفه على الاطالة بس وطننا وأهلنا بحاجة للخير والمحبة، وكل واحد فينا عليه مسؤولية إنه ينشر الكلام الطيب ويبتعد عن أي شيء يسبب الفرقة أو الكراهية بين الناس وطننا بستاهل منا كل خير، وأبسط شي نقدمه إله إننا نحافظ عليه نظيف ومرتب، لأنه صورة البلد تعكس أخلاق أهلها وانتماءهم الحقيقي
الله يديم الامن والامان ويحفظ سيدنا الملك عبد الله الثاني بن الحسين المعظم .
فيروز العيسى