دولة الرئيس لا تتفلسف علينا ....

09 شباط 2019
54 مرات

 

عكاظ الاخبارية :

بقلم / احمد الطيب


الرزاز يقول ان الاردنيون يحبطون بسهوله ...
يا اخي والله كلما تكلمتم كلما سقطتم من اعيوننا ....
بدي اسألك دولة الرئيس عمرك قعدت عن الشغل اربع خمس سنين وما عرفت تصرف على أولادك
عمرك يا دولة الرئيس اخذت قرض وما عرفت تكمل اقساطه وطبعت قبلاتك على كنادر موظفي الدائرة القانونية الي تابعين للبنك مشان ما يرفعوا قضية عليك
عمرك بحياتك دولة الرئيس ما كان معك ثمن فوط لاطفالك ولا ثمن علاجهم
عمرك دولة الرئيس كنت مطلوب للتنفيذ القضائي وشردت من دوريات الغلق لانو عليك كمبياله ب ١٠٠ دينار مكسورة لمحل اثاث باقي ثمن غرفة نوم
عمرك بعت أرض ورثها ابوك من جد جدك مشان تدفع أقساط الجامعه لواحد من اولادك
عمرك دولة الرئيس حقدت على الدوله لانوا ابوك بدو يموت وما مكان في سرير بكل مستشفيات وزارة الصحة بأقسام العناية المركزة
عمرك دولة الرئيس تهاوشت انت ومرتك لأنها بدها تشتري فستان جديد من التنزيلات مشان عرس أخوها وما معك تعطيها
عمرك دولة الرئيس نمت جيعان مشان اولادك يتعشو
عمرك دولة الرئيس عملت مشكله مع الي بقطعوا الكهربا عن بيتك لانو عليك ٤ فواتير كهربا
عمرك دولة الرئيس زارتك اختك وأولادها ونامت عندك يومين وما قمت بواجبها لانو جيبتك فاضية
عمرك تذللت لرقيب سير مشان ما يخالفك لانو مزاج الشرطي معكر.... عمرك تبهدلت مشان تدبر نقوط لانو اخوك بده يتجوز ... عمرك طلعت مشوار انت وأولادك وقطعتك السيارة بنزين.... عمرك رحت على العقبة ونمت بالشارع لانو ما معك اجرة شقه تنام فيها.... عمرك عشبت باميه... ولقطت عنب ونزلت تبيعوا بالسوق المركزي
دولة الرئيس لأنك عمرك ما شعرت بمعاناتنا ما رح تفهمنا ...مشان هيك لا تتفلسف علينا وتحكي اننا نحبط بسرعه
انا اعتذر لأني كتبت بالعامية ولم اكتب بالفصحى علك يا دولة الرئيس تصلك الرساله لأننا تعبنا من الكتابه بالفصحى ولم تصلك الرساله

17022399_224326681366694_3416414042965097148_n.jpg

 

 

 

رأيك في الموضوع

التعليقات تعبر عن ارآء قراء الموقع و ليست بالضرورة تعبر عن رأي الموقع